حملتني تسعة اشهر وشالت همي سنين ومازال كيانها وقلبها بينبض في الحياة مع نبض اولادها والمقابل يوم فقط لا غير

حبيت ابدا معاكم رجوعي للكتابة بموضوع بيضايقني جدا وبتعتبره اهانة برغم الكل فاكره تكريم
وهوا عيد الام
عارفين بحسه دعوة غريبة من نوعها ونص الدعوة بيقول : ( عصيان وعقوق واهانة وشتيمة وتقليل ووجع قلب للام طول السنة الا يوم 21 مارس ممنوع العقوق لازم تصالحها بهدية لحد بس اليوم مايخلص اللي بعده علاطول ارجع تاني للي كنت عليه واعصيها وعقها )

ياجماعة احنا كمسلمين عارفين ديننا كويس واصول المعاملة الاسرية وخاصة مع الام مذكورة في القران والاحاديث النبوية

قال الله تعالى : { وَاعْبُدُوا اللَّهَ وَلا تُشْرِكُوا بِهِ شَيْئاً وَبِالْوَالِدَيْنِ إِحْسَاناً وَبِذِي الْقُرْبَى وَالْيَتَامَى وَالْمَسَاكِينِ وَالْجَارِ ذِي الْقُرْبَى وَالْجَارِ الْجُنُبِ وَالصَّاحِبِ بِالْجَنْبِ وَابْنِ السَّبِيلِ وَمَا مَلَكَتْ أَيْمَانُكُمْ إِنَّ اللَّهَ لا يُحِبُّ مَنْ كَانَ مُخْتَالاً فَخُوراً } [ النساء / 36 ] .

وقال تعالى : { وَقَضَى رَبُّكَ أَلا تَعْبُدُوا إِلا إِيَّاهُ وَبِالْوَالِدَيْنِ إِحْسَاناً إِمَّا يَبْلُغَنَّ عِنْدَكَ الْكِبَرَ أَحَدُهُمَا أَوْ كِلاهُمَا فَلا تَقُلْ لَهُمَا أُفٍّ وَلا تَنْهَرْهُمَا وَقُلْ لَهُمَا قَوْلاً كَرِيماً } [ الإسراء / 23 ] .

وقال تعالى : { وَوَصَّيْنَا الأِنْسَانَ بِوَالِدَيْهِ حَمَلَتْهُ أُمُّهُ وَهْناً عَلَى وَهْنٍ وَفِصَالُهُ فِي عَامَيْنِ أَنِ اشْكُرْ لِي وَلِوَالِدَيْكَ إِلَيَّ الْمَصِيرُ } لقمان/14 ، وقال تعالى : { فَهَلْ عَسَيْتُمْ إِنْ تَوَلَّيْتُمْ أَنْ تُفْسِدُوا فِي الأَرْضِ وَتُقَطِّعُوا أَرْحَامَكُمْ . أُولَئِكَ الَّذِينَ لَعَنَهُمُ اللَّهُ فَأَصَمَّهُمْ وَأَعْمَى أَبْصَارَهُمْ } محمد/22 ، 23 .

وصح عن رسول الله صلى الله عليه وسلم أنه قال: ألا أنبئكم بأكبر الكبائر ؟ قالوا : بلى يا رسول الله ، قال : الإشراك بالله ، وعقوق الوالدين وكان متكئا فجلس فقال : ألا وقول الزور ألا وشهادة الزور ، وسأله صلى الله عليه وسلم رجل فقال : يا رسول الله أي الناس أحق بحسن صحابتي ؟ قال : أمك ، قال : ثم من ؟ قال : ثم أمك ، قال : ثم من ؟ قال : ثم أمك ، قال : ثم من ؟ قال : أبوك ثم الأقرب فالأقرب .

وقال عليه الصلاة والسلام " لا يدخل الجنة قاطع " ، يعني : قاطع رحم ، وصح عنه صلى الله عليه وسلم أنه قال : من أحب أن يبسط له في رزقه ويُنسأ له في أجَله فليصل رحمه " ، والآيات والأحاديث في بر الوالدين وصلة الرحم وبيان تأكيد حق الأم كثيرة مشهورة وفيما ذكرنا منها كفاية ودلالة على ما سواه وهي تدل مَنْ تأملها دلالة ظاهرة على وجوب إكرام الوالدين جميعا واحترامهما والإحسان إليهما وإلى سائر الأقارب في جميع الأوقات وترشد إلى أن عقوق الوالدين وقطيعة الرحم من أقبح الصفات والكبائر التي توجب النار وغضب الجبار نسأل الله العافية من ذلك .

والنصوص واضحة وصريحة بر الوالدين والاحسان وحسن المعاملة والرحمة بهما
والام بالذات الرسول عليه الصلاة والسلام خصها بالمعاملة الحسنة اكثر من الاب موش معنى كدة ان ابوك مالهوش كلمة ولا تبجح فيه وتقوله امك ثم امك ثم امك وبعدها ابوك حايقولك نعم ياروح امك خليها تنفعك ههههههههه واصحابك حايقولولك ابن امك الجملة الغريبة اللي بنسمعها دايما ابن امه ابن امه ماهو ابنها امال ابن ام لهب ؟

المهم بعد ده كله عاوزين الغرب واليهود يفرضوا علينا ثقافتهم وعاداتهم المختلفة تماما عن واقع حياتنا
طب احنا واقعنا مختلف عنهم احنا بنحترم الام وكل يوم اكيد بنحب تكون راضية عننا ومعاها ليل نهار مناقررة وحكاوي واستشارات وكلام كتير حاتروح منها فين ؟ دي الام المصرية لو ابنها خرج قعد عالقهوة تبعاتله ابوه وتتبلى عليه بمصيبة عملها علشان يعاقبه ويحبسه قدام عينيها في البيت
وياويله وسواد ليله لو عدى يوم وماباسش اديها وشافته كدة محتاجلها وبيتحاما فيها
اما الغرب فاساسا الاسر مفككة والابناء منفصلين تماما عن ابائهم وامهاتهم وكل واحد في عيشته ماهم لاشرع ولا دين بيحكمهم زينا يبقى يعملوا مابدالهم بقى السايبين دول

فعندهم نظرا للجفاء ونظرا لان الام نسيت شكل ولادها بيتجمعوا في يوم يجيبولها الهدايا ويفكروها شكلهم بقى عامل ازاي ؟
ولما خلاص بقى يكبروا قوي ويبقوا عاجزين عن خدمة نفسهم يرموهم في دار المسنين ماهم موش فاضينلهم يراعوهم ويشيلوا شوية من اللي شالوهم ياما في صحتهم
وللاسف عندنا كمان كتر الموضوع ده وفي دار المسنين قصص وحكاوي تشيب لها الرؤوس
ام مابيسالش عنها حد من ولادها رموها وزي مايكونوا زاحوا هم عن قلوبهم ناس من هيئة حكومية راحولهم زيارة وبيسالوا الام دي نفسك نجيبلك ايه في عيد الام قالتلهم موش عاوزة حاجة نفسي اشوف ولادي قبل مااموت طيب عنوانيهم ايه وارقام تليفوناتهم يمكن نساعدك ماتعرفش حاجة غير اساميهم وبس وصورهم معاها بتطلعها وتبوسهم كل ما حسيت بشوق ليهم
وهما طبعا ولا هما هنا ولا ذرة رحمة ونبض في قلبهم يرولها بس اشتياقها ليهم
وغيرها كتير من حالات بحس انها من ناس كفرة ويهود موش مسلمين ابدا والاسلام والدين متبري منهم وغضب ربنا بيسبق غضب الام

فهل في نظركم السنين دي كلها اللي الام ضحت بصحتها واعصابها وغير الام اللي اترملت وعاشت تربي ولادها بس وصبرت لحد مابقوا حاجة تشرف وفي الاخر مالقيتش اللي يشيلها في مرضها وماتت بالمرض وحيدة في بيتها ولقيوا جثتها في الشقة بقالها اسبوع دليل ان مافيش حد يهمه امرها ولا بيسال عليها الام اللي كانت كل مايحتاجولها يلاقوها بتنجدهم وبتعمل المستحيل علشانهم ووقت ماهيا في اشد الحاجة ليهم رموها وسابوها تموت من الحزن والحسرة

حسبي الله ونعم الوكيل لكل القلوب اللي غشاها غبار القسوة وكساها صدا الجفاء

معقولة هوا ده الجزاء المنتظر لامهات المسلمين

وفكرة الاحتفال بعيد الام في مصر ترجع للاخوين مصطفي امين وعلي امين مؤسسي دار اخبار اليوم والسبب كثرة الشكاوي اللتي وصلت لهم من الامهات من سوء معاملة ونكران جميل وجفاء وقسوة فاقترحوا الفكرة ولقيوا تشجيع وتاييد ليها لا وايه كاموا طالبين اسبوع للام بدل يوم شفتوا الكرم اللي اصلا المفروض نكرمها كل يوم ونديها عنينا وقلوبنا وده اقل شيء بنردلها الجميل باقل القليل

بس عارفين الامهات دوول اغلب من الغلب وبرغم كدة وبرغم احساسهم بالمهانة بيستنوا اليوم ده علشان يشوفوا الهدايا اللي جايالهم ايه

وخاصة الحما بقى وياسلام لو فيه سلايف ومستنية مين اللي حاتقدرها اكتر منهم ومين اللي حاتفضحها وتقولها ايه ده مالقيتيش ارخص من كدة تجيبيه

والام الحقيقية بقى ياعيني بتقارن بين هدايا ولادها وهدايا ولاد جارتها وكل ام في اليوم ده تتصل بالتانية مخصوص علشان تسالها ولادك جابولك ايه ؟

يا جماعة حرام والله اللي بيتعمل في الامهات ده ده الام بالذات يابختك لو نلت رضاها ويابختك لو جبتلها كل مايكون معاك فلوس حاجة تفرحها او تريحها
انا عن نفسي كل مابلاقي حاجة مناسبة لماما في اي وقت ومعايا فلوس بجيبهالها وحماتي كمان طبعا لاحسن الحرب تشتغل ومااخلصش ومابعرفش ماما جبت لحماتي ايه ولا بعرف حماتي جبت لماما ايه
وبعرفهم من قبلها اني الدنيا كلها رخيصة تحت رجليهم وموش مقامهم يوم من ايام السنة ويافخرهم ويافرحهم اما حد يسالهم ولادك جابولك ايه وتقولهم ولادي طول السنة بيجيبولي وكفاية حبهم ليا ولهفتهم لشوفتي وسؤالهم كل يوم

ياترى حاتختاروا ايه تهينوا امهاتكم باليوم ده ولا تشرفوها بالايام وتكرموها كل يوم ولو بكلمة حلوة

وماتنسوش انه بدعة وكل بدعة ظلالة وكل ظلالة في النار
شفتوا قد ايه اسلامنا وديننا جميل وبيكفل كرامة وحقوق كل اسرة مع بعضهم واحنا برضه موش عاجبنا وبنقلد الغرب وبنمشي ورا بدعهم

__________________

حملتني تسعة اشهر وشالت همي سنين ومازال كيانها وقلبها بينبض في الحياة مع نبض اولادها والمقابل يوم فقط لا غير Q8lots12666170131

هون عليك فكل الأمر ينقطع
وخل عنك ضباب الهم يندفع
فكل هم له من بعـده فـرج
وكل كرب إذا ضاق يتسـع
إن البلاء وإن طال الزمان به
الموت يقطعه أو سوف ينقطع

» اشهر العاب المصارعة الحرة SmackDown.vs.Raw.2010.PS2 علي اكثر من سيرفر
» مجموعة من اشهر الاغاني في حب مصر لاشهر الفنانين عدد 38 اغنية بحجم 189 ميجا بصيغة Mp3 جودة رائعة علي اكثر من سيرفر
» لن تغرق سفينة الحياة في بحر من اليأس !!